Author Archives: Antonio Picallo
Presentación da colección “Mulleres bravas da nosa historia”
O próximo mércores 1 de Febreiro ás 18:30 h. na Biblioteca Forum temos a presentación da colección “Mulleres bravas da nosa historia” de Urco Editora.
Rosalía de Castro, María Victoria Moreno… Elas son as protagonistas dunha colección que pretende dar a coñecer a algunhas das mulleres exemplares da historia da Galicia aos máis pequenos.
Ademais de contar a biografía das protagonistas, os libros contarán con actividades para realizar coas nenas e nenos e cronoloxía, todo para axudar a valorar a achega das protagonistas á nosa cultura e ao noso país, ás veces ocultada polo feito de ser muller.
Todos os libros contarán coas ilustracións de Eva Agra e texto de diferentes autoras de renome, como María Lado, Eli Ríos, Elvira Ribeiro, Ledicia Costas, María Reimóndez,…
Presentación do libro “Verdades creadas” de Rodrigo Costas
O próximo martes 20 de Decembro ás 19:00 h. temos na Biblioteca Municipal Forum Metropolitano a presentación do novo libro de Rodrigo Costas, “Verdades creadas”, publicado por Ediciones Oblicuas. Presenta o acto Alberto Trinidad, director da editorial.
Os catro textos que compoñen este libro (un relato que non é un relato, a historia dun personaxe atrapado nas súas palabras, a viaxe dun pai coas súas fillas e a autopsia dun proceso xudicial) e que o converten nun falso volume de relatos, comparten, ademais de numerosos motivos que se estenden e entrelazan duns a outros, tres trazos comúns: unha mesma e peculiar estrutura narrativa na que o tempo non xoga ningún papel; o feito de que todos eles aludan a outra obra, real ou ficticia; e que os catro abordan a cuestión do que entendemos por verdade e o seu engarce co real. O resultado é un volume formado por pezas autónomas que cobran todo o seu sentido como conxunto.
RODRIGO COSTAS FREIJEIRO:
Nacido en Vigo no 1977, publicou ata a data a novela “En las afueras” (Ediciones Oblicuas, 2015), o relato “Entre Palabras” (finalista do II Certame de Relatos de El Bistró de La Central del Callao, 2013), o poemario De Valera (accésit de poesía nos Premios Minerva, 1995) e numerosos post, artigos, recensións artísticas, crónicas de talleres editoriais e narracións curtas aos que se pode acceder a través da súa web.
Presentación do libro “O penalti de Djukic” de Carlos Taibo
O próximo xoves 15 de Decembro ás 19:30 h. temos na Biblioteca Municipal Forum Metropolitano a presentación do novo libro de Carlos Taibo, “O penalti de Djukic”, publicado por Através Editora.
Estarán na presentación do libro o alcalde da Coruña, Xulio Ferreiro; o xornalista e director de “Galicia por diante“, na Radio Galega, Kiko Novoa; o editor de AGAL, Valentim Fagim; e o directivo do Deportivo, Enrique Calvete.
O penalti de Djukic, editado por Através Editora
Dous profesores, un lisboeta e outro galego-madrileño, afeccionados polo mesmo equipo: o Deportivo da Coruña. Pola súa correspondencia virtual repasan a historia do Deportivo, a condición dos seus afeccionados, as glorias e as miserias do club, a propia cidade da Coruña, a rivalidade co Celta ben como o fútbol na súa versión máis tranquila e sociable. Este libro é, antes de nada, un texto amable no que non falta o humor e a ironía.
Profesor de Ciencia Política na Universidad Autónoma de Madrid, onde dirixiu no pasado o programa de estudos rusos. Traballou durante anos en cuestións vinculadas coas relacións internacionais e publicou monografias sobre a globalización, a hexemonía dos Estados Unidos, os movementos de resistencia ou o decrecemento.
Versos en movemento na Biblioteca Forum
…que es la poesía. ¿Es poesía lo que me eriza los pelos en la nuca? ¿Lo que me produce ese escalofrío que me sube por la columna? ¿Un vuelco, en el estómago?¿El rapto de un instante en el que la respiración y el tiempo desaparecen?¿Un vislumbre de la verdad?¿Los ojos girados hacia dentro y los párpados bajados como un denso telón para que nada pueda distorsionar la verdad súbitamente revelada? ¿Es la compañía perfecta? ¿Es un puñetazo en el alma?…
…La poesía es, así pues, un interruptor que enciende la luz interior, una oda cuya energía acciona un secreto resorte en la mente, activando una recepción en nuestro decimonónico sentido.
…¿Es la canción poesía?
Unos dicen que sin la muleta de la música el texto de una canción no se aguanta por sí solo en una página en blanco, mientras otros sostienen que el elemento mágico de una canción es precisamente la poesía. Probablemente, al igual que la poesía, que es más que la suma de sus partes, la canción también lo sea, es decir, más que música y letras juntas. No queda más que leer el texto, precisamente, para sentenciar si participa del propósito y principio fundamental de la poesía, es decir, establecer una calidad de comunicación y albergar una verdad como pura experiencia personal
Alberto Manzano
Dende 13 de Xaneiro ao 31 de Marzo na Biblioteca Forum Metropolitano a Poesía será a protagonista das súas actividades.
“Mostra Bibliográfica”
A Música e a poesía son cómplices e amantes e constitúen o alimento da nosa alma, e por isto, nesta mostra bibliográfica imos nutrirnos dunha selección de poemas feitos cancións, cancións feitas con poesía e poemas que sen dúbida están cheos de melodía.
Obradoiro: “Grúa poética”
Mércores, 27 de xaneiro ás 18:30 h
Inscrición previa dende o 20 de xaneiro na web: http://www.coruna.es/bibliotecas
Obradoiro dirixido a nenos e nenas de 7 a 12 anos, coa colaboración de Celia Parra, no que se unirá a arte de atopar as palabras para crear poemas, coa arte do origami para confeccionar grúas de papel onde os nenos e nenas farán voar os seus versos. Deste xeito celebraremos todos xuntos o Día Internacional da non violencia e da Paz.
Recital de poesía: “Cocíñame”: poemario erótico-culinario
Mércores, 17 de febreiro ás 19:30 h.
Entrada libre ata completar capacidade
Celia Parra vainos presentar un recetario de poemas nos que o verbo amar e o verbo comer seguen a mesma conxugación. Un menú completo no que cada plato é unha invitación ao goce, a amar-comer cos ollos e coas mans.
Coñece este proxecto de poesía, cociña e fotografía que vai fervendo a lume lento.
Recital de poesía e música: “A forza da palabra no ritmo do silencio”
Luns, 21 de marzo ás 19:30 h.
Entrada libre ata completar capacidade
Xulio Valcárcel, Olga Patiño, Miguel Mato, Diana Varela, Xosé Taboada e Martín Marticorena invitánnos a compartir con eles a súa música verbal, o xogo de resonancias, en definitiva, o seu xeito de percibir o mundo, de tentar expresar a fonda realidade humana.
Actividades Astronómicas na Biblioteca Forum
Baixo o título “#ÉoCosmos!”, a Biblioteca Municipal Forum Metropolitano organiza para os meses de maio, xuño e xullo unha selección dos mellores materiais relacionados coa Astronomía, incluíndo as mellores novelas e películas de ciencia ficción.
Astronomía:
Astronomía é a ciencia que se ocupa do estudo dos corpos celestes do universo, incluídos os planetas e os seus satélites, os cometas e meteoros, as estrelas, etc. O seu rexistro e a investigación da súa orixe vén a partir da información que chega deles a través da radiación electromagnética ou de calquera outro medio. A astronomía estivo ligada ao ser humano desde a antigüidade e todas as civilizacións tiveron contacto con esta ciencia. Personaxes como Aristóteles, Ptolomeo, Hipatia de Alexandría, Nicolás Copérnico, Galileo Galilei, foron algúns dos seus cultivadores. É unha das poucas ciencias nas que os afeccionados aínda poden desempeñar un papel activo, especialmente no descubrimento e seguimento de fenómenos como curvas de luz de estrelas variables, descubrimento de asteroides e cometas, etc. Temos os mellores manuais de Astronomía a disposición dos usuarios e ademáis podes coñecer a vida e obra de grandes astrónomos.
Novela de ciencia ficción:
No seu século e medio de existencia, a literatura de ciencia ficción pasou por períodos caracterizados por moi diversos estilos. Desde as fabulosas fantasías tecnolóxicas de Verne e Wells até os máis recentes cyberpunk e steampunk, por citar un par de exemplos, diversas correntes e etapas marcaron a historia do xénero. Nesta mostra bibliográfica ofrecemos unha selección de obras destacadas dentro da novela de ciencia ficción pero só relacionadas coa Astronomía. Obras como “Crónicas marcianas” (1950) de Ray Bradbury ou “Blade Runner: ¿Sueñan los androides con ovejas eléctricas?” (1968) de Philip K. Dick son dous exemplos que nos poderemos atopar na mostra.
Cinema e Astronomía:
No cinema houbo e hai grandes valedores do xénero da ciencia ficción. Ben mediante a adaptación de contos e novelas, ben mediante a produción de películas con guións especialmente creados para a gran e a pequena pantalla. O cinema de ciencia ficción utilizouse en ocasións para comentarios críticos de aspectos políticos ou sociais, e a exploración de cuestións filosóficas como a definición de ser humano. O xénero existiu desde os comezos do cinema mudo, cando o Lle Voyage dans a Lune (1902) de Georges Méliès asombrou á súa audiencia cos seus efectos fotográficos. Desde a década de 1930 até a de 1950, o xénero consistía principalmente en películas de serie B de baixo orzamento. Tras o fito de Stanley Kubrick de 2001: A Space Odyssey de 1968, o cinema de ciencia ficción foi tomado máis en serio. A finais da década de 1970, películas de orzamento alto con efectos especiais convertéronse en populares entre a audiencia. Películas como Star Wars (1977) ou Close Encounters of the Third Kind (1977) achandaron o camiño de éxitos de vendas nas seguintes décadas como Alien (1979), E.T.: The Extra-Terrestrial (1982), Blade Runner (1982) e Men in Black (1997).
Ademais, dende a Biblioteca, e coa colaboración da Agrupación Astronómica Coruñesa Ío, propoñémosche unha serie de actividades complementarias para achegar a Astronomía aos cidadáns:
Observación astronómica / 22 de Maio ás 22:30 h.
Inscrición previa desde o 15 de Maio
No Parque Europa, coa Agrupación Ío como mestra de ceremonias, observaremos as estrelas, os planetas e a lúa -sempre que o tempo acompañe-. Apto para tódolos públicos.
As estrelas máis preto do que imaxinas / 1 de Xuño
Charla con Óscar Blanco (Agrupación Ío) na que veremos a relación existente entre o ceo e o noso día a día. Sabes que hábitos e tradicións teñen que ver coa astronomía?. Descúbreos!!
O ceo é para todos / 4 de Xuño ás 18:30 h.
Inscrición previa desde o 28 de Maio.
Obradoiro experimental orientado a nenos e nenas de 5 a 7 anos. Música, danza, expresión artística e teatral para os que miramos estrelas querendo soñar.
Cinema e Astronomía / 11 Xuño ás 19:00 h.
Da man do crítico de cine Martin Pawley veremos que a astronomía e o cine comparten algo máis que estrelas. Unha viaxe retrospectiva que vai desde “Le voyage dans Lune” ata Interstellar.
Quero ser Astronauta / 18 Xuño ás 18:30 h.
Inscrición previa desde o 11 de Xuño.
Saberías utilizar un brazo robótico e/ou pilotar unha nave espacial?. Se tes entre 9 e 13 anos, e queres coñecer de primeira man as probas para convertirte nun astronauta, non o dubides, apúntate. Actividade realizada a través de Ler Conta Moito.
Consulta o cartel e o material no Wiki da Mostra. As actividades que necesitan inscrición previa, será na web das Bibliotecas Municipais da Coruña. Máis información na propia web, no teléfono 981 184 298 ou no mostrador da Biblioteca.
As novelas máis prestadas en lingua galega no 2014 nas Bibliotecas Municipais da Coruña
As novelas máis prestadas en lingua galega no 2014 nas Bibliotecas Municipais da Coruña:
- Ollos de auga / Domingo Villar (Galaxia, D.L. 2006)
- Made in Galiza / Séchu Sende (Galaxia, D.L. 2007)
- Os fillos do mar / Pedro Feijoo (Xerais, 2012)
- O corazón de Xúpiter / Ledicia Costas (Xerais, 2012)
- A memoria da choiva / Pedro Feijoo (Xerais, 2013)
- A praia dos afogados / Domingo Villar (Galaxia, D.L. 2009)
- O único que queda é o amor / Agustín Fernández Paz (Xerais, 2007)
- Cartas de inverno / Agustín Fernández Paz (Xerais, 1998)
- A cabeza de Medusa / Marilar Aleixandre (Xerais, D.L. 2008)
- Os vellos non deben de namorarse / Castelao (Galaxia, 2004)
- O gardián invisible / Dolores Redondo ; traducción Héctor Cajaraville (Xerais, 2013)
- Ámote Leo A. Destino xalundes / Rosa Aneiros (Xerais, 2013)
- O derradeiro libro de Emma Olsen / Berta Dávila (Galaxia, 2013)
- Futuro imperfecto / Xulia Alonso Díaz (Galaxia, D.L. 2010)
- As voces baixas / Manuel Rivas (Xerais, 2012)
- Non hai noite tan longa / Agustín Fernández Paz (Xerais, 2011)
- Noite de voraces sombras / Agustín Fernández Paz (Xerais, 2002)
- Pepa A Loba / Carlos G. Reigosa (Xerais, 2007)
- A esmorga / Eduardo Blanco Amor (Galaxia, 2006)
- Todos somos / Marcos Calveiro (Xerais, 2013)
- Resistencia / Rosa Aneiros (Xerais, 2007)
- Faneca brava / Manuel Portas (Xerais, 2013)
- Esperando o leiteiro / Xosé Neira Vilas (Galaxia, D.L. 2012)
- O pintor do sombreiro de malvas / Marcos Calveiro (Xerais, 2010)
- A banda sen futuro / Marilar Aleixandre (Xerais, 1999)
Consulta a dispoñibilidade destas obras no noso Catálogo:
Recorda que nas Bibliotecas teñen en marcha unha inicitiva de recomendacións literararias, musicais e cinematográficas vía Twitter, coa nosa conta @bibcoruna, baixo o lema COLABORA CON NÓS! e co hashtag #recomendamosbmc os tuiteiros poden manifestar os seus gustos e compartir as súas preferencias.
Outra historia do cinema na Biblioteca Forum
Ao longo do mes de outubro a Biblioteca do Forum Metropolitano celebra o cinema na súa diversidade, o seu glorioso pasado e o seu presente igualmente luminoso.
- Mostra Bibliográfica: OUTRA HISTORIA DO CINEMA
Do 1 ao 31 de Outubro
A historia do cinema, tal e como nola contaron sempre, tende a ser lineal, masculino e occidental. A cada etapa sucédelle outra, coma se fosen chanzos dunha escaleira de sentido único; non parece haber máis cine que o americano e europeo de tramas claramente novelescas, con algún toque exótico oriental; e os directores, guionistas e produtores adoitan ser homes (por suposto brancos). Pero a verdadeira historia é outra: está inzada de mulleres que crearon obras indispensables, ábrese dende a súa mesma orixe a formas non narrativas e ramifícase por todo o planeta para alimentarse de culturas, linguas, paisaxes e maneiras de entender o mundo moi diferentes. O cine é un e moitos á vez.
Na Biblioteca do Forum Metropolitano preparamos unha mostra bibliográfica con materiais diversos, que podes consultar na seguinte wiki: Outra Historia do Cinema
- Visita guiada de Martin Pawley: Paseo das estrelas
7 de Outubro ás 19:00 h.
Visita guiada de Martin Pawley (Programador, crítico e productor de cine).
A Biblioteca converténse durante o mes de outubro nun auténtico “paseo das estrelas” ao máis puro estilo hollywodiense, onde as protagonistas son Elas (directoras, guionistas, actrices …) as mulleres máis destacadas no mundo do cine ao longo da historia.
- Mesa Redonda:
A historia do cinema sempre tende a ser lineal, masculino e occidental, pero a verdadeira historia é outra. Participa con nós e coñece outra historia do cinema:
21 de outubro ás 19:00 h.
Participantes:
Martin Pawley (Programador, crítico e produtor de cine)
José Manuel Sande (Programador do CGAI, crítico e historiador de cine, guionista e produtor de ARRAIANOS)
Xabier P. Docampo (Escritor e cinéfilo)
Uxía Villarino (Profesora e cinéfila)
TO THE WONDER 
, de Terrence Malik.
* Festival de Venecia 2012: Premio SIGNIS.
Formato: 35 mm
02, 03 e 04 de outubro
Neil deixou Estados Unidos buscando unha vida mellor, deixando atrás unha serie de feitos dolorosos. Mirando a Mariña aos ollos, Neil está seguro de que atopou á muller que pode amar con dedicación. Pero cando anos máis tarde, unha serie de circunstancias persoais e profesionais rachan a súa relación, outra muller aparece na vida de Neil, con igual ou mesmo maior forza: Jane. Logrará este home manterse fiel á súa promesa inicial ou aproveitará para cambiar a súa vida cara ao futuro que sempre anhelou?
UN CHÂTEAU EN ITALIE
, de Valeria Bruni Tedeschi
Formato: DVD
09, 10 e 11 de outubro
É a familia de Louise. Pero, cando ela coñece a Nathan, os seus soños de felicidade rexorden.
É tamén a historia do seu irmán enfermo e o destino dunha familia italiana, obrigada a desfacerse do seu patrimonio e parte dos seus recordos. Un mundo que acaba e un amor que dá comezo.
LES SALAUDS, de Claire Denis
Formato: 35 mm
16, 17 e 18 de outubro
O seu cuñado acaba de suicidarse, a fábrica familiar está ao bordo da quebra e a súa sobriña está ingresada nun hospital psiquiátrico. Sandra acusa a Edouard Laporte de ser o responsable de todos os seus males. Decidido a vingar o dano que causou á súa familia, Marco se muda ao mesmo edificio onde vive a amante de Laporte. Pero Marco non contaba cos segredos que a súa irmá non lle desvelou.
L’IMAGE MANQUANTE, de Rithy Panh
* Festival de Cannes 2013: Mellor película
Formato: 35 mm
23, 24 e 25 de outubro
Os cidadáns foron enviados a campos de traballo e coa clara intención de eliminar as divisións de clase, todos os efectos persoais foron confiscados e os individuos substituídos por números. As torturas e execucións convertéronse en moeda de cambio á menor infracción.
Nun audaz salto imaxinativo, a historia é representada mediante figuras de arxila superpuestas na narración.
- Mapamundi con referencias a cineastas: Cineastas do mundo
A través dun Mapamundi o “espectador” poderá ver e ser partícipe da diversidade fílmica existente ao longo dos 5 continentes. A modo de panel interactivo será o “espectador” quen descubra, coa axuda dunhas pequenas pinceladas biográficas, a identidade nacional dos cineastas.
- Caixa dos desexos
Farémonos eco dos teus desexos máis cinéfilos. Poderasnos deixar por escrito as suxerencias de todos aqueles filmes que che gustaría ver ou que tivésemos na biblioteca.
- “3 Minutos: Taller de edición de curtametraxes”
Cando: 13, 20 e 27 de outubro, ás 19.00h
Público: de 12 a 16 anos
Inscrición (15 prazas) : do 29 de setembro ao 10 de outubro, na biblioteca, no teléfono 981 184 298 ou enviando un mail a bforum@coruna.es.
Rodaranse curtas suxeridas a partir de personaxes literarias adaptando así os seus aspectos característicos á biblioteca. Usaranse diversas técnicas ademais da imaxe real: debuxo, Stop Motion…
Os nenos aprenderán todo o proceso de montaxe e edición de vídeo, os procesos de efectos sonoros e voces así como a gravación de música. Ao finalizar cada participante terá a súa copia en formato dixital.
Presentación do libro, “Manfred von Ricthofen, El Barón Rojo” no Forum
O escritor J. Eduardo Caamaño presentará o seu libro “Manfred von Ricthofen, El Barón Rojo” na Biblioteca Municipal Forum Metropolitano o mércores 8 de Outubro ás 19:00 h.
A biografía máis completa que se coñece ata a data en español do mítico Barón Vermello.
A OBRA:
“Manfred von Ricthofen, El Barón Rojo” foi editado por Almuzara no 2014 coincidindo co ano no que se conmemora o centenario do comezo da Primeira Guerra Mundial. Escrito cun estilo fluído e de amena lectura, este libro biográfico tamén detalla grandes anécdotas da súa vida, curiosidades do conflito, e fai unha reconstrución dos seus soados combates, ademais dunha interesante análise acerca da polémica creada ao redor da súa morte suceso considerado como un dos misterios máis intrigantes da Primeira Guerra Mundial. O lector coñecerá ao detalle os avións pilotados polo Barón Vermello, os seus combates aéreos e o desenvolvemento de toda a traxectoria do piloto máis exitoso da Primeira Guerra Mundial.
O AUTOR:
J. Eduardo Caamaño (Río de Janeiro, 1972) é licenciado en económicas, pero foi seducido pola historia desde moi neno. Nun domingo calquera de 1984, ao entrar nun quiosco para comprar cómics, foi atraído pola primeira entrega dunha enciclopedia sobre uniformes militares, unha colección que aínda conserva en casa. Pasados case trinta anos e incapaz de deter a súa adicción por libros castrenses, acabou acumulando unha pequena biblioteca persoal que suma máis de mil títulos, case todos relacionados con historia militar dos séculos XIXe XX. Un día decidiu escribir sobre a vida do “Barón Vermello”, un pracenteiro proxecto persoal que se converteu nunha obsesión. Para iso, dedicou cinco anos de estudo e investigación reunindo unha infinidade de documentos, libros e copias de arquivos provenientes de diversos países, que acabou culminando coa publicación desta obra que inclúe apartados traducidos ao español por primeira vez, converténdose no libro máis completo sobre o Barón Vermello publicado en España e América Latina.
Día Mundial do Refuxiado
Hoxe, 20 de xuño, celébrase o Día Mundial do Refuxiado, e esta semana, na Biblioteca Municipal Forum Metropolitano e na Biblioteca Municipal Sagrada Familia temos un Stand informativo e de sensibilización da ONG ACCEM, para que os visitantes poidan dispor de parte do material co que conta e coñezades as actividades que promove.
No Día Mundial do Refuxiado, Accem quere pór de relevo unha situación preocupante que é a imposibilidade de acceder á protección que dá o estatuto de refuxiado para miles de persoas. Imposibilítao o mero feito de non poder chegar ao territorio español e europeo. Os fluxos de persoas que tratan de chegar ao noso territorio son mixtos, formados por inmigrantes e refuxiados, polo que as accións de rexeitamento e as devolucións en fronteira impiden non só acceder a Europa senón a unha protección internacional á que teñen dereito.
Os conflitos armados son neste momento a primeira causa de desprazamento forzoso no mundo. Conflitos como os abertos en Siria, Mali, Somalia, Afganistán, Sudán, Iraq ou a R.D. Congo xeran a maior parte dos máis de 45 millóns de persoas refuxiadas no mundo. 4.485 desas persoas solicitaron protección internacional en España en 2013 o que constitúe unicamente o 1% das rexistradas en Europa (434.160 solicitudes).
Ás dificultades de acceso únense as dos procedementos. Reflexo diso é que só a 205 destas persoas recoñecéuselles o dereito ao estatuto do refuxiado en España e a 325 o estatuto de protección subsidiaria. Isto supón que ao 22,61% recoñecéuselles o dereito a protección internacional. Un incremento respecto ao ano anterior pero non suficiente.
Nas Bibliotecas Municipais da Coruña #recomendamosbmc unha selección sobre a temática do Refuxiado.
#LeConOrgullo nos clubs de lectura
O 28 de xuño é o Día do Orgullo LGBT (lesbiana, gai, bisexual e transexual), tamén coñecido como Día do Orgullo Gai, é unha serie de eventos que cada ano os colectivos LGBT celebran de forma pública para instar pola tolerancia e a igualdade dos gais, lesbianas, bisexuais e transexuais.
Dende xa hai uns anos as Bibliotecas Municipais da Coruña vólcanse nunha serie de actividades que esta semana iremos adiantando.
AS MUNICIPAIS ENTENDEN:
Os fondos das bibliotecas son (e deben ser) un fiel reflexo da sociedade e moi especialmente das comunidades ás que prestan servizo de proximidade. Como bibliotecas, e como bibliotecarixs, debemos ser partícipes, e mesmo impulsorxs, dos procesos de erradicación de toda manifestación excluínte, optando sempre por unha vía integradora da diversidade.
Calquera persoa que se achegue a unha biblioteca pública buscando información sobre o feito homosexual, bisexual e transexual require de nós unha resposta eficiente. Esta resposta debe traducirse nunha integración total de materiais que toquen a temática LGTB nas nosas estanterías e, ademais, no ciberespazo.
É por isto último que nace esta wiki de cores: para contribuír e apoiar á comunidade LGTB na súa loita polo respecto.
OS CLUBS DE LECTURA:
Son moitas as persoas que participan nos clubs de lectura das Bibliotecas Municipais, moitas e con moi diversos intereses. E precisamente por esa diversidade, a experiencia resulta enriquecedora e satisfactoria. Intercambio de opinións, vivencias, puntos de vista en torno ás vidas ficticias de personaxes que salen do papel e viven fora da ficción, e que no fondo son reflexos ficcionais de personaxes que, en maior ou menor medida, crúzanse nas nosas vidas no día a día.
Dende as Bibliotecas Municipais queremos invitarvos a participar dunha sesión especial do Clubs de Lectura o mércores 25 de xuño na Biblioteca Forum Metropolitano da Coruña, a obra elexida para a ocasión será El azul es un color cálido de Julie Maroh, editado en España por Dibbuks:
El azul es un color cálido, Julie Maroh:
Clementine é unha adolescente sen problemas. Chega do campo para integrarse nun instituto no que sente a gusto. Un día crúzase na rúa cunha parella de mozas. Unha leva o pelo tinguido de azul, e sorrille, mentres Clementine baixa a vista. A partir deste preciso momento todo vai cambiar para ela: a súa relación cos seus novos amigos, o seu sitio na familia, as súas prioridades? e sobre todo a súa sexualidade. É difícil saber que aspecto ten o amor. Ás veces doe e sempre hai obstáculos no camiño. Pero unha calor inabarcable instálase no estomago, que che fai vibrar e empúxache a superarche.
A autora conseguiu cativar ao público e á crítica, conseguindo varios premios como os de Mellor Obra por votación popular e Autor Novel no Festival de Angoulême e o de Mellor Autor Novel no Salón do Cómic e das Artes Gráficas de Roubaix, (Francia).
No noso blog especializado en Cómics, Fancomic.es, temos una reseña propia.
Para participar na sesión especial dos Clubs de Lectura o mércores 25 de xuño na Biblioteca Forum Metropolitano da Coruña, tes que confirmar asistencia antes do venres 20 de xuño, no email bforum@coruna.es
